Klinik hallar

Aşağı çənənin sağ tərəfində təkrarlanan ağrı və şişkinlik. Diş dişətinin səthinə çıxmamış, üfüqi mövqedə qonşu azı dişinin kökünə söykənmişdi.

3D komputer tomoqrafiya ilə dişin köklərinin alt çənə sinirinə münasibəti dəqiqləşdirildi. Lokal keyitmə altında dişət qaldırıldı, diş fraqmentlərə bölünərək sinirə toxunmadan çıxarıldı, yara PRF membranı ilə örtülüb tikildi.

Keyimə müşahidə olunmadı. Şişkinlik 3-cü gündən azalmağa başladı, tikişlər 7-ci gün götürüldü. Qonşu azı dişi qorundu.

Uzun illər əvvəl itirilmiş üst arxa dişlər. Sümük hündürlüyü implant üçün kifayət etmirdi, pasiyentə əvvəllər «implant mümkün deyil» deyilmişdi.

Lateral pəncərə üsulu ilə açıq sinus lifting aparıldı, membran qaldırılaraq boşluq ksenoqreft materialı ilə dolduruldu. 6 ay sonra nəzarət tomoqrafiyası ilə sümük yetişməsi təsdiqləndi və implantlar yerləşdirildi.

Kifayət qədər sümük həcmi bərpa olundu, implantlar planlanmış mövqedə yerləşdirildi və osseointegrasiya problemsiz getdi. Pasiyent sabit protezlə çeynəmə funksiyasına qayıtdı.

Şikayət olmadan, başqa səbəbdən çəkilmiş panoramik rentgendə təsadüfən aşkarlanan geniş sümük boşluğu. Kist sümüyü nazikləşdirmiş və sinir kanalına yaxınlaşmışdı.

Ölçüsünə görə mərhələli yanaşma seçildi: əvvəlcə marsupializasiya ilə boşluq kiçildildi, sümük bərpa olunduqdan sonra ikinci mərhələdə sistektomiya aparıldı. Toxuma histoloji müayinəyə göndərildi.

Sinir funksiyası tam qorundu, sümük defekti nəzarət rentgenlərində tədricən doldu. Kistlə əlaqəli dişlərin bir hissəsi kanal müalicəsi ilə saxlanıldı.

Zərbədən sonra dişlərin bir-birinə düzgün oturmaması, çənəni hərəkət etdirərkən güclü ağrı və ağızda qanama.

3D tomoqrafiya ilə sınıq xətti və fraqmentlərin yerdəyişməsi dəqiqləşdirildi. Ümumi anesteziya altında açıq repozisiya və titan lövhələrlə osteosintez aparıldı, dişləmə əvvəlki vəziyyətinə qaytarıldı.

Dişləmə bərpa olundu, çənənin uzunmüddətli bağlanmasına ehtiyac qalmadı. Pasiyent erkən mərhələdə yumşaq qidalanmaya, 6 həftə sonra normal rejimə keçdi.

Ön dişlərin qapanmaması, çeynəmə zamanı tez yorulma və profil narahatlığı. Ortodontik müalicə təkbaşına nəticə verməmişdi — problem skelet mənşəli idi.

Ortodontla birgə plan quruldu: cərrahiyyə öncəsi hazırlıq, 3D modelləmə üzərində əməliyyatın simulyasiyası, ağız daxilindən aparılan osteotomiya və titan fiksasiya.

Dişləmə düzgün mövqeyə gətirildi, çeynəmə funksiyası normallaşdı. Üz dərisində görünən çapıq qalmadı, şişkinlik bir ay ərzində keçdi.

Kanal müalicəsi aparılmış və koronka ilə örtülmüş dişin kökündə davam edən iltihab, dişətində təkrarlanan fistula.

Dişi çıxarmaq əvəzinə apikal rezeksiya seçildi: kökün iltihablı ucu və ətrafındakı patoloji toxuma götürüldü, kanal ucu bioloji materialla germetikləşdirildi. Mövcud koronkaya toxunulmadı.

Fistula bağlandı, şikayət aradan qalxdı. Nəzarət rentgenlərində sümük defekti tədricən doldu, diş və üzərindəki protez konstruksiyası saxlanıldı.

Ağız açarkən çırtıltı, qulaq önündə ağrı, səhərlər çənə əzələlərində yorğunluq və ağzın məhdud açılması. Uzun müddət qulaq problemi kimi müalicə olunmuşdu.

Klinik müayinə və görüntüləmə ilə diaqnoz dəqiqləşdirildi. Cərrahi müdaxiləyə keçmədən fərdi gecə şinası hazırlandı, fizioterapiya, əzələ relaksasiyası və davranış tövsiyələri tətbiq olundu.

Bir neçə həftə ərzində ağrı nəzərəçarpan dərəcədə azaldı, ağız açılışı bərpa olundu. Cərrahi müdaxiləyə ehtiyac qalmadı.

Körpənin əmmə çətinliyi, süd almada zəiflik və ananın ağrı şikayəti. Müayinədə dilin hərəkət sərbəstliyinin ciddi məhdudlaşdığı müəyyən edildi.

Lokal keyitmə altında frenulotomiya aparıldı. Prosedur bir neçə dəqiqə çəkdi, minimal qanama ilə keçdi.

Körpə prosedurdan dərhal sonra əmizdirildi, əmmə mexanikası yaxşılaşdı. Toxumanın yenidən qısalmaması üçün hərəkət məşqləri göstərildi.